Kolektivi për Mendim dhe Veprim Feminist ka organizuar një protestë mbarëkombëtare në Prishtinë, për të vazhduar kërkesat për drejtësi dhe përgjegjësi lidhur me vrasjen tragjike të Arlinda Zekajt.
Protesta do të mbahet këtë të shtunë nga ora 12:00, duke nisur nga Katedralja “Nënë Tereza”.
Sipas njoftimit, vrasja e Arlindës dhe reagimi i institucioneve shtetërore kanë çuar në një krizë dhe pasiguri shoqërore, e cila, sipas Kolektivit, mund të tejkalohet vetëm me përgjegjësi shtetërore dhe me garantimin se jeta e grave merret seriozisht. “Vrasja makabre e Arlindës e ka ekspozuar në mënyrë të paprecedentë të gjithë zinxhirin institucional që, kur gratë ndihen në rrezik dhe kërkojnë ndihmë, në vend se t’i mbrojë, i anashkalon dhe me duart e veta i dërgon drejt vrasjes,” thuhet në njoftim.
Përveç kërkesave për drejtësi, kjo organizatë kërkon nga shteti që ta shpallë femicidin si urgjencë kombëtare, si një zotim për të gjitha vajzat dhe gratë e Kosovës. “Arlinda Zekaj na e ka lënë amanet që të kërkojmë përgjegjësi, e këtë amanet ne po e zgjasim jo veç për Arlindën dhe çdo grua të vrarë, por edhe për çdo vajzë e grua të gjallë.
Patriarkisë shtetërore Arlinda ia ka lëkundë themelet, tani është e jona që këtë ta çojmë deri në fund, për t’i dhënë fund njëherë e mirë dhunës së shumëfishtë ndaj vajzave e grave në Kosovë,” thuhet tutje në njoftim.
Kjo organizatë ka renditur gjashtë kërkesa, të cilat duhet të përmbushen: “1.
Shkarkim, ndjekje penale dhe burgim për kryeprokuroren Lumturije Vuçetaj, prokuroren e rastit Suada Rama Hamza, kryetarin e gjykatës Shemsedin Haxhiaj, gjykatësin Migjen Kastrati, ushtruesen e detyrës së drejtores së QPS-së Shpresa Lukajn, togerin Faruk Muqolli dhe çdo zyrtar/e tjetër të përfshirë; 2.
Shkarkim të Donika Gërvallës dhe Xhelal Sveçlës, dorëheqjen e Gazmend Muhaxherit; 3.
Trajtimin e vrasjes së grave si urgjencë kombëtare; 4.
Sigurim të banimit social për të mbijetuarat e dhunës në familje; 5.
Veting apartiak dhe të pavarur të sistemit të drejtësisë; 6.
Legalizim të sprejit vetëmbrojtës për gra,” është thënë në njoftim.
Burimi origjinal i informacionit: zeri .info
