Jose Mourinho ka zhvilluar bisedime me përfaqësuesit e JJ Gabriel, talentit të Manchester Unitedit, ndërsa Real Madridi është duke e forcuar pozitat për ta transferuar atë.
Sipas gazetarit Alvaro Esteban, trajneri i Real Madridit është angazhuar personalisht në përpjekjet për të siguruar shërbimet e Gabrielit, duke diskutuar me rrethin e tij për një transferim të mundshëm në Santiago Bernabeu.
Kjo ndodh pas raportimeve se Real Madridi është në prag të arritjes së një marrëveshjeje për transferimin e 16-vjeçarit.
Gjiganti spanjoll ka bërë përparime të rëndësishme, pavarësisht konkurrencës nga Barcelona dhe klube të tjera evropiane.
Sky Sports raportoi të mërkurën se madrilenët kanë arritur një marrëveshje verbale me Gabrielin për një transferim të mundshëm në janar.
Megjithatë, ende nuk ka pasur kontakte zyrtare mes klubeve, ndërsa Manchester Unitedi vazhdon të jetë klubi aktual i futbollistit.
Gabriel kishte kërkuar largimin nga ‘Old Trafford’ në shtator, për shkak të pakënaqësisë me mungesën e mundësive për të luajtur në ekipin e parë.
Që atëherë, ai po stërvitet në Spanjë dhe po shqyrton hapat e ardhshëm në karrierën e tij.
Talenti anglez iu bashkua Manchester Unitedit në moshën 11-vjeçare dhe sezonin e kaluar u shpall Lojtari i Vitit në Ligën Premier për grupmoshën U18.
