Këto ditë shënojnë më shumë se dy vjet që kur Taylor Swift ishte e detyruar të anulonte koncertet e saj të turneut “Eras Tour” në Vjenë, për shkak të një komploti terrorist që kishte për qëllim të vriste dhjetëra mijëra njerëz.
Tashmë, ky ngjarje do të jetë në qendër të një dokumentari të ri.
Sipas raportimeve të fundit, dokumentari “Taylor Swift Wien” po realizohet nga regjisorët Andreas Pichler dhe Veronika Kaserer dhe pritet të shfaqet premierë në tetor të vitit 2027.
Pas transmetimit të tij në televizionin gjerman ZDF, dokumentari do të shpërndahet edhe në tregun ndërkombëtar.
Ky lajm vjen disa muaj pas dënimit të njërit prej të dyshuarve, i identifikuar si Beran A., i cili u dënua me 15 vjet burg për planifikimin e një sulmi ndaj fansave të Taylor Swift në stadiumin Ernst Happel.
Pikërisht aty këngëtarja kishte planifikuar të mbante tri koncerte të turneut “Eras Tour” në gusht të vitit 2024.
Sipas hetimeve, i dyshuari kishte planifikuar të sulmonte fansat me thika ose eksplozivë të improvizuar.
Me mbështetje nga inteligjenca amerikane, autoritetet austriake arritën ta arrestonin atë dhe dy të dyshuar të tjerë të lidhur me komplotin, para se sulmet të realizoheshin.
Megjithatë, koncertet u anuluan si masë parandaluese për të garantuar sigurinë e publikut.
Hetuesit zbuluan se, para planifikimit të sulmeve, tre të dyshuarit kishin shprehur besnikëri ndaj organizatës terroriste Shteti Islamik (ISIS), pasi ishin radikalizuar përmes internetit.
Kjo është njëra nga tri temat kryesore që do të trajtojë dokumentari.
Sipas përshkrimit të tij, “Taylor Swift Wien” do të vërë në kontrast komunitetet ekstremiste dhe mizogjene në internet me “botën gjithëpërfshirëse dhe fuqizuese të fansave të Swift”, të njohur si “Swifties”.
Pavarësisht anulimit të koncerteve, shumë fansa u mblodhën në rrugët e Vjenës për të kënduar këngët e artistes, për të shkëmbyer byzylykë miqësie dhe për të gjetur mbështetje te njëri-tjetri, përballë një ngjarjeje që për pak sa nuk përfundoi në tragjedi.
Një tjetër fokus i dokumentarit do të jenë hetimet e autoriteteve, të cilat do të paraqiten si një garë kundër kohës, si dhe mënyra se si ato arritën ta parandalonin komplotin terrorist. “Anulimi i koncerteve tona në Vjenë ishte shkatërrues”, kishte shkruar Swift në një deklaratë të publikuar në Instagram, disa javë pas arrestimeve. “Arsyeja e anulimit më mbushi me një ndjenjë të re frike dhe me një faj të jashtëzakonshëm, sepse kaq shumë njerëz kishin planifikuar të merrnin pjesë në ato koncerte.
Por isha gjithashtu jashtëzakonisht mirënjohëse ndaj autoriteteve, sepse falë tyre, po përjetonim dhimbjen e anulimit të koncerteve dhe jo humbjen e jetëve.
Më dha shpresë dashuria dhe uniteti që pashë te fansat, të cilët u bashkuan me njëri-tjetrin”, kishte shprehur këngëtarja.
Ylli i muzikës pop e ka trajtuar këtë komplot terrorist edhe në dokumentarin e saj për platformën Disney+, “Taylor Swift: The End of an Era”. “Ne i shpëtuam një masakre”, kishte shprehur ajo në dokumentarin e publikuar në dhjetor të vitit 2025, xhirimet e të cilit kishin nisur ndërsa Swift po përgatitej të performonte në Londër, më pak se një javë pas ngjarjeve në Austri.
Burimi origjinal i informacionit: telegrafi .com
