Pas vrasjes tragjike të Arlinda Zekajt më 25 tetor në Vitomiricë të Pejës, përgjegjësia dhe funksionimi i institucioneve të sigurisë janë vënë në qendër të vëmendjes.
Kryeprokurori i Shtetit, Zejnulla Gashi, ka vendosur të bëjë disa ndryshime në sistemin prokurorial.
Ai ka caktuar prokurorët e Zyrës së Kryeprokurorit të Shtetit si mbikëqyrës të prokurorive përkatëse në vend.
Zyra e Kryeprokurorit të Shtetit ka njoftuar se më 3 nëntor 2026, Gashi ka emëruar prokurorët mbikëqyrës, duke u bazuar në kompetencat e përcaktuara me Ligjin Nr. 08/L-167 për Prokurorin e Shtetit. “Prokurorët e caktuar do të jenë kompetentë për mbikëqyrjen e menaxhimit dhe efikasitetit të prokurorive përkatëse, si dhe për mbështetjen, këshillimin dhe monitorimin e prokurorive në zbatimin e udhëzimeve dhe vendimeve të Zyrës së Kryeprokurorit të Shtetit,” thuhet në përgjigjen e Zyrës së Kryeprokurorit të Shtetit.
Sipas vendimit, mbikëqyrësit janë caktuar si më poshtë: – Bahri Hyseni dhe Aleksandër Lumezi mbikëqyrin Prokurorinë e Apelit. – Lulzim Sylejmani dhe Veton Shabani mbikëqyrin Prokurorinë Speciale të Republikës së Kosovës, Prokurorinë Themelore në Gjakovë dhe atë në Gjilan. – Besim Kelmendi dhe Shqipdon Fazliu mbikëqyrin Prokurorinë Themelore në Prishtinë dhe atë në Prizren. – Shqipdon Fazliu dhe Ersan Qavolli mbikëqyrin Prokurorinë Themelore në Ferizaj. – Agron Qalaj dhe Ersan Qavolli mbikëqyrin Prokurorinë Themelore në Mitrovicë dhe atë në Pejë.
Zyra e Kryeprokurorit ka sqaruar se përgjegjësitë e prokurorëve mbikëqyrës përfshijnë gjithashtu trajtimin e lëndëve të vjetra dhe atyre me prioritet, identifikimin e sfidave dhe problematikave institucionale, si dhe mbikëqyrjen e zbatimit të shqyrtimit të detyrueshëm të lëndëve. “Mbikëqyrja do të bëhet gjithmonë duke respektuar pavarësinë funksionale të prokurorëve,” thuhet në përgjigjen e Zyrës së Kryeprokurorit të Shtetit.
Po ashtu, prokurorët e caktuar do të marrin pjesë në kolegjiumet e prokurorive përkatëse dhe do të kenë një rol aktiv në mbështetjen dhe këshillimin e tyre për zbatimin e udhëzimeve dhe vendimeve të Zyrës së Kryeprokurorit.
Sipas kësaj zyre, vendimi synon të forcojë llogaridhënien dhe transparencën institucionale, si dhe të fuqizojë koordinimin dhe komunikimin e brendshëm. “Ky vendim ka për qëllim forcimin e llogaridhënies dhe transparencës institucionale, si dhe fuqizimin e koordinimit dhe komunikimit të brendshëm në funksion të përmbushjes së prioriteteve dhe objektivave të Prokurorit të Shtetit,” thuhet në përgjigjen e Zyrës së Kryeprokurorit të Shtetit.
Përveç ndryshimeve në sistemin prokurorial pas rastit tragjik të Arlinda Zekajt, ka pasur gjithashtu ndryshime në Policinë e Kosovës, si emërime dhe caktime të reja në disa pozita të rëndësishme, përfshirë zëvendësdrejtorin e përgjithshëm, Departamentin e Hetimeve, Inteligjencën dhe Analizën, Departamentin e Kufirit dhe drejtoritë rajonale.
Policia ka njoftuar se këto ndryshime janë bërë në përputhje me procedurat ligjore dhe nevojat organizative.
Burimi origjinal i informacionit: zeri .info
