Deputeti i Aleancës, Besnik Tahiri, ka shprehur shqetësime lidhur me Projektligjin për Akademinë e Drejtësisë, duke theksuar se ai mund të dëmtojë pavarësinë institucionale të këtij institucioni.
Në një postim të tij, Tahiri thekson se Akademia e Drejtësisë luan një rol të rëndësishëm në ndërtimin e kapaciteteve profesionale të sektorit të drejtësisë, sidomos për Këshillin Prokurorial të Kosovës (KPK) dhe Këshillin Gjyqësor të Kosovës (KGJK).
Ai përmend se Akademia duhet të ketë kapacitetet e nevojshme për të zhvilluar programe moderne dhe cilësore trajnimi, përveçse të ruajë pavarësinë e saj institucionale. “Akademia e Drejtësisë duhet të jetë një institucion i fortë dhe profesional trajnimi.
Ajo duhet të ketë kapacitete të mjaftueshme për të zhvilluar programe moderne, cilësore dhe të përshtatura me sfidat e kohës, në mënyrë që të ndihmojë sektorin e drejtësisë të ecë përpara në reformat e veta.
Por, po aq e rëndësishme është që Akademia ta ruajë pavarësinë e saj institucionale si Agjenci,” ka shkruar Tahiri.
Deputeti vlerëson se projektligji ngre shqetësime për cenimin e kësaj pavarësie, duke kërkuar që rekomandimet e Komisionit të Venecias të përfshihen në ligj. “Nga ajo që kam parë, ky projektligj ngre shqetësime serioze për cenimin e kësaj pavarësie.
Prandaj, është thelbësore që rekomandimet e Komisionit të Venecias të merren parasysh dhe të përfshihen në ligj,” ka theksuar ai.
Në përfundim, Tahiri ka theksuar se reforma në drejtësi nuk mund të ndërtohet duke dobësuar institucionet që kanë për detyrë ta mbështesin atë. “Reforma në drejtësi nuk mund të ndërtohet duke dobësuar institucionet që duhet ta mbështesin atë,” shtoi Tahiri.
Burimi origjinal i informacionit: zeri .info
