Historia e futbollit evropian është e pasur me ngjarje të rëndësishme, por ajo nuk është ndërtuar vetëm mbi trofe e suksese.
Disa nga klubet më të njohura të kontinentit kanë kaluar edhe periudha të errëta, të shënuara nga tragjedi njerëzore, skandale korrupsioni, luftëra dhe ndikimi i regjimeve politike.
Manchester Unitedi, Liverpooli, Barcelona, Bayern Munichu, Juventusi dhe Torino janë disa nga klubet që kanë përjetuar ngjarje të rënda, duke lënë gjurmë të pashlyeshme në historinë e tyre.
Një nga datat më të dhimbshme për Manchester Unitedin është 6 shkurti 1958.
Në atë ditë, skuadra angleze po kthehej nga Beogradi, ku kishte siguruar kualifikimin në gjysmëfinale të Kupës së Evropës pas përballjes me Crvena Zvezdën.
Avioni u ndal në Mynih për të furnizuar me karburant, por përpjekjet për t’u ngritur dështuan dy herë për shkak të problemeve me motorin.
Në tentimin e tretë, bora dhe lluca penguan avionin të arrinte shpejtësinë e nevojshme.
Ai doli nga pista, përplasi një gardh dhe u përplas me një ndërtesë, duke marrë flakë.
Në bord ndodheshin 44 persona, përfshirë futbollistë, gazetarë dhe tifozë.
Tragjedia mori jetën e 23 personave, mes tyre tetë futbollistë të njohur si “Busby Babes”.
Portieri Harry Gregg ndihmoi në shpëtimin e të mbijetuarve, ndërsa trajneri Matt Busby pësoi lëndime të rënda, por arriti të rikuperohej.
Bobby Charlton gjithashtu i mbijetoi aksidentit dhe vazhdoi një karrierë të jashtëzakonshme.
Pavarësisht goditjes së madhe, Busby u rikthye dhe nisi rindërtimin e skuadrës.
Dhjetë vjet pas tragjedisë, Manchester Unitedi fitoi për herë të parë Kupën e Evropës, duke e bërë aksidentin e Mynihut një nga ngjarjet më të dhimbshme në historinë e futbollit anglez.
Më 15 prill 1989, Liverpooli u përball me Nottingham Forestin në gjysmëfinalen e Kupës FA në stadiumin Hillsborough.
Ajo që duhej të ishte një ditë e rëndësishme sportive u shndërrua në një nga tragjeditë më të rënda.
Për shkak të mbingarkesës jashtë stadiumit, komandanti i policisë David Duckenfield urdhëroi hapjen e një porte të madhe hyrëse.
Si pasojë, mijëra tifozë u drejtuan drejt tribunave qendrore të sektorit Leppings Lane, ku hapësira ishte e pamjaftueshme për numrin e madh të njerëzve.
Presioni krijoi një shtypje fatale, duke shkaktuar vdekjen e 97 personave dhe lëndimin e shumë të tjerëve.
Ndeshja u ndërpre pas ngjarjeve tragjike.
Në ditët pasuese, pati përpjekje për t’ua hedhur fajin tifozëve të Liverpoolit, por hetimet e mëvonshme rrëzuan këto pretendime dhe nxorën në pah dështimet e policisë.
Një hetim i ri në vitin 2016 arriti në përfundimin se tifozët ishin vrarë në mënyrë të paligjshme.
Tragjedia e Hillsboroughit mbetet një plagë e hapur për klubin dhe familjet e viktimave.
Barcelona kaloi një nga periudhat më të vështira në vitet 1930, kur trazirat politike në Spanjë ndikuan në klub.
Një nga ngjarjet më të rënda ishte vrasja e presidentit Josep Sunyol, i cili ishte zgjedhur në krye të Barcelonës në korrik të vitit 1935.
Pas shpërthimit të Luftës Civile Spanjolle në vitin 1936, Sunyol u ekzekutua pa gjyq më 6 gusht 1936.
Në historinë e Barcelonës, Sunyol njihet si “presidenti martir”.
Klubi e ka përkujtuar atë ndër vite, duke përfshirë një memorial në vendin ku u vra.
Paqëndrueshmëria politike dhe financiare ndikoi rëndë në Barcelonë, duke mos e lejuar atë të fitonte tituj në vitet 1930.
Në vitin 1937, një grup i punonjësve të klubit mori disa futbollistë në një turne në Shtetet e Bashkuara dhe Meksikë për të përmirësuar gjendjen financiare.
Bayern Munichu u përball me një periudhë të errët pas ardhjes në pushtet të Adolf Hitlerit dhe Partisë Naziste në vitin 1933.
Klubi kishte fituar titullin e parë të kampionit të Gjermanisë në vitin 1932, por ngritja e regjimit nazist solli ndryshime të mëdha.
Presidenti Kurt Landauer u detyrua të largohej dhe më pas u burgos.
Bayern u etiketua si “Judenklub” nga nazistët.
Në vitin 1935, klubi u detyrua të zbatonte rregulla diskriminuese, duke ndryshuar edhe simbolin e tij.
Historia e tij nën regjimin nazist nuk është trajtuar me transparencë deri në vitin 2011, kur Bayern nisi ta përkujtonte atë kapitull dhe rolin e Kurt Landauerit.
Në vitin 2006, Juventusi u përfshi në skandalin Calciopoli, ku hetimet zbuluan një sistem ndikimi në përzgjedhjen e gjyqtarëve për ndeshjet e Serie A.
Juventus u dënua me zbritje në Serie B dhe iu hoqën titujt e sezonit 2004/05 dhe 2005/06.
Disa yje u larguan, por disa të tjerë vendosën të qëndrojnë dhe ta ndihmojnë klubin në Serie B.
Juventus u rikthye në elitën e futbollit italian në vitin 2007, por Calciopoli mbetet një nga kapitujt më të errët të historisë së tij.
Një tjetër ngjarje që lidh historinë e Juventusit dhe Liverpoolit është tragjedia e stadiumit Heysel në Bruksel më 29 maj 1985.
Para finales së Kupës së Evropës, përplasjet mes tifozëve shkaktuan panik.
Në përpjekje për t’u shpëtuar, shumë tifozë u shtynë drejt një muri betoni, i cili u shemb nën presionin e turmës.
Si pasojë, 39 persona humbën jetën dhe rreth 600 të tjerë u lënduan.
Pavarësisht tragjedisë, finalja u zhvillua dhe Juventusi fitoi me rezultat 1-0.
Pas ngjarjes, klubet angleze u përjashtuan nga garat evropiane për pesë vjet, ndërsa Liverpooli u dënua me një vit shtesë.
Në fund të viteve 1940, Torino ishte një nga skuadrat më dominuese të futbollit italian, duke fituar pesë tituj kampioni.
Por më 4 maj 1949, një tragjedi ajrore i dha fund asaj skuadre të jashtëzakonshme.
Pas një ndeshjeje miqësore në Lisbonë, futbollistët e Torinos po ktheheshin në Itali.
Avioni u përplas në kodrën Superga, duke shkaktuar vdekjen e 31 personave, përfshirë futbollistët dhe anëtarët e ekipit.
Hetimet treguan se një defekt në altimetër kishte dhënë të dhëna të pasakta, duke e bërë të pamundur shmangien e përplasjes.
Pas tragjedisë, Torino u shpall kampion i Italisë për sezonin 1948/49, dhe varrimi i viktimave u përcoll nga qindra mijëra njerëz.
