Seanca në Gjykatën e Apelit për rastin e Liridona Ademajt është caktuar të mbahet më 29 tetor, në orën 09:50.
Naim Murseli kërkon ndryshimin e vendimit, konkretisht uljen e dënimit, përmes një ankese prej 30 faqesh që është dorëzuar nga dy avokatët e tij.
Në këtë ankesë, ai pretendon se gjykata e shkallës së parë ka vlerësuar provat në mënyrë të njëanshme dhe selektive, ndërsa mbrojtja e tij ngrit pretendime edhe për mënyrën e marrjes në pyetje nga policia.
Nga ana tjetër, familja Ademaj ka dorëzuar gjithashtu një ankesë në Apel.
Përmes avokatit të tyre, ata kërkojnë që, përveç Murselit dhe Granit Plavës, edhe i akuzuari Kushtrim Kokalla të dënoset me burgim të përjetshëm.
Dënimi prej 30 vjetësh burgim ndaj Kokallës, i shpallur fajtor për ndihmën që iu dha Murselit dhe Plavës, po vlerësohet nga familja e Liridonës si i pamjaftueshëm.
Asnjë nga rrethanat rënduese, siç theksohet në ankesën e dorëzuar, nuk janë vlerësuar në mënyrë të drejtë, përfshirë shkallën e lartë të rrezikshmërisë shoqërore dhe mënyrën mizore të vrasjes.
Sipas gjykatës, treshja ka funksionuar si grup kur e kanë hartuar planin për vrasjen e Liridona Ademajt më 29 nëntor 2023.
Kushtrim Kokalla, pasi refuzoi ta kryejë vetë vrasjen, gjeti Granit Plavën, i cili për një shumë parash, qëlloi me armë në drejtim të Liridona Ademajt.
Planin e kishin hartuar bashkëshorti i të ndjerës, Naim Murseli, i cili ishte gjithashtu bashkekzekutor i gruas, për shkak të mllefit dhe dëshirës për hakmarrje lidhur me marrëdhëniet e çrregullta dhe përfitimin financiar.
Burimi origjinal i informacionit: zeri .info
