Deputeti i vetëm shqiptar në Parlamentin e Serbisë, Shaip Kamberi, ka reaguar ndaj deklaratave të Aleksandar Vuçiqit që sulmojnë listën e përbashkët parlamentare shqiptare.
Ai ka theksuar se përpjekja për ta paraqitur atë si armike të shtetit ka për qëllim të zhvendosë vëmendjen nga problemet dhe të drejtat e shqiptarëve në Luginën e Preshevës.
Kamberi, përmes një reagimi, thekson se shqetësimi i Vuçiqit nuk duhet parë vetëm për numrin e mandateve që mund të fitojë koalicioni shqiptar, por edhe për ndikimin politik dhe diplomatik që një përfaqësim i bashkuar dhe i pavarur mund të ketë. “Çështja nuk është domosdoshmërisht sa deputetë shqiptarë do të hyjnë në Parlament, por çfarë do të përfaqësojnë ata politikisht dhe çfarë mund të bëjnë me atë përfaqësim,” ka shkruar ai.
Ai gjithashtu ka kritikuar etiketimin e listës shqiptare si armike e shtetit, duke e quajtur këtë një zhvendosje të debatit nga konkurrenca zgjedhore te besnikëria ndaj shtetit. “Kur një ish-president dhe kandidat për kryeministër e paraqet një listë zgjedhore të pakicës kombëtare si armike, ai e zhvendos debatin nga programi, të drejtat dhe rezultatet te lojaliteti ndaj tij e partisë shtet,” ka deklaruar Kamberi.
Deputeti ka pretenduar se ky narracion është në funksion të përçarjes së listës shqiptare dhe ushtrohet presion politik ndaj partive dhe kandidatëve që mund të bashkëpunojnë me të.
Ai gjithashtu ka diskutuar deklaratat e Vuçiqit lidhur me shërbime të huaja, duke thënë se këto pretendime përdoren për të paraqitur Serbinë si një vend nën presion të jashtëm.
Kamberi thekson se rëndësia e përfaqësimit shqiptar nuk matet vetëm me numrin e votave në Parlament, por edhe me aftësinë për t’i ngritur problemet e shqiptarëve në institucionet vendore dhe ndërkombëtare.
Ai ka përmendur tri fusha ku deputetët shqiptarë mund të kenë ndikim: debati parlamentar për pasivizimin e adresave, diskriminimin dhe nënpërfaqësimin; adresimi i këtyre çështjeve te institucionet evropiane dhe organizatat ndërkombëtare; si dhe dëshmimi se ekziston një përfaqësim shqiptar që nuk identifikohet me politikën e qeverisë serbe. “Ndikimi i deputetit nuk matet vetëm me votat që ka në Parlament, por edhe me aftësinë për ta bërë një problem të brendshëm çështje të përgjegjësisë institucionale dhe ndërkombëtare,” theksoi Kamberi.
Ai gjithashtu vlerëson se një përfaqësim shqiptar i bashkuar, kritik dhe i pavarur mund të jetë më i vështirë për t’u kontrolluar politikisht sesa një përfaqësim që përshtatet me pushtetin.
Kamberi ka theksuar se Vuçiqi po përpiqet të ndryshojë fokusin e debatit publik nga problemet që përballen shqiptarët në Luginën e Preshevës te arsyet pse ata kërkojnë të drejtat e tyre dhe bashkëpunojnë politikisht me përfaqësues nga Kosova. “Kështu ai e vendos pakicën në pozitën e të akuzuarit dhe e largon vëmendjen nga detyrimet e shtetit, sidomos nga katër marrëveshjet e nënshkruara (2001, 2009, 2013 dhe 2022), të cilat Serbia nuk po i respekton,” ka shkruar ai.
Kamberi ka përfunduar duke theksuar se kërkesa për përfaqësim më të fuqishëm shqiptar synon zbatimin e ligjeve, barazinë institucionale dhe përgjegjësinë shtetërore.
Ai ka theksuar se deklaratat e Vuçiqit se nuk do të lejojë ndërkombëtarizimin e çështjes së shqiptarëve në Luginën e Preshevës duhen parë në kontekstin e përpjekjeve për ta kufizuar ndikimin politik dhe diplomatik të përfaqësimit shqiptar. “Një listë që ai mund ta mposhtë lehtësisht në numra, mund të jetë shumë më e vështirë që të neutralizohet në planin politik dhe diplomatik, nëse ajo listë ruan pavarësinë, disiplinën dhe besueshmërinë e saj,” ka përfunduar Kamberi.
Burimi origjinal i informacionit: zeri .info
