Deputeti i Lëvizjes Vetëvendosje, Arbër Rexhaj, ka theksuar se ish-krerët e Ushtrisë Çlirimtare të Kosovës, Hashim Thaçi, Kadri Veseli, Jakup Krasniqi dhe Rexhep Selimi, kanë bërë zgjedhjen e tyre për avokatët dhe po mbrohen secili në mënyrë të veçantë në procesin gjyqësor në Hagë.
Duke u shprehur për mundësinë e mbrojtjes së përbashkët, Rexhaj ka përmendur se kryeministri Albin Kurti kishte sugjeruar një ide të tillë, por ka theksuar se kjo nuk do të thotë domosdoshmërisht se ajo do të ishte zgjidhja më e mirë.
Ai theksoi se institucionet e Kosovës i janë përgjigjur plotësisht kërkesave të Dhomave të Specializuara në Hagë, sidomos në aspektin financiar.
Rexhaj gjithashtu e përmendi rastin e ish-gjeneralit kroat Ante Gotovina, duke e krahasuar angazhimin e shtetit kroat në procesin e tij gjyqësor me qasjen që, sipas tij, po ndjek Kurti ndaj ish-krerëve të UÇK-së. “Avokatët të cilët i kanë zgjedhur Hashim Thaçi, Kadri Veseli, Jakup Krasniqi dhe Rexhep Selimi, janë zgjedhur nga ata vetë dhe po mbrohen veç e veç.
Ideja e tyre ka qenë që të mbrohen veç e veç, ndërsa ideja jonë dhe e kryetarit Albin Kurti është se ndoshta kjo nuk është zgjidhja e duhur, sepse në fund ata janë dënuar sipas hierarkisë që kanë pasur.
Republika e Kosovës, institucionet tona i kanë përmbushur në plotni kërkesat e atyre në Hagë, veçanërisht në aspektin financiar.
Megjithatë, ka pasur diskutime nëse do të duhej të ishin avokatë vendorë apo të huaj.
Në rastin e Gotovinës, kur shteti kroat është angazhuar, ata kanë pasur një përfshirje institucionale, ndërsa e di se Ministria e Drejtësisë sonë ka qenë pa monitorues.
Pjesëmarrja shtetërore e Kroacisë ka qenë e pranishme në Apel, dhe po them që Kurti po e merr shembullin e mirë të Kroacisë.
Janë raste të ndryshme, por në kuptimin e përgjithshëm, situata është kështu”, shprehet Rexhaj.
Burimi origjinal i informacionit: zeri .info
