Mbrëmjen e së mërkurës, 63 minatorë të Trepçës janë ngujuar brenda minierës për shkak të një defekti që ka ndodhur në pajisjet e furnizimit me energji elektrike.
Ministrja e Ekonomisë, Artane Rizvanolli, ka njoftuar se sipas informacionit nga menaxhmenti i Trepçës, minatorët janë në gjendje të mirë shëndetësore. “Minatorët që ndodhen brenda minierës pas defektit në pajisjet elektrike janë në gjendje të mirë.
Ata janë pjesë e ndërrimit të dytë, i cili përfundon në orën 23:00”, ka thënë Rizvanolli.
Ekipet teknike janë angazhuar për të riparuar defektin dhe për të rikthyer furnizimin me energji elektrike.
Po ashtu, sipas Rizvanollit, po organizohet edhe dalja graduale e minatorëve përmes daljes emergjente.
Menaxhmenti i Trepçës është në vendngjarje, ndërsa aty kanë qenë edhe njësitet e Policisë së Kosovës dhe zjarrfikësit.
Burimi origjinal i informacionit: zeri .info
