Aktorja Claire Danes, këngëtarja dhe aktorja Cynthia Erivo dhe supermodelja Claudia Schiffer ishin disa nga të ftuarat në sfilatën e shtëpisë franceze të modës Chloe, e mbajtur në Observatorin e Parisit, një hapësirë historike e shekullit XVII, si pjesë e Javës së Modës në Paris.
Për sezonin Pranverë-Verë 2027, Chloe prezantoi koleksionin e titulluar “Obsession”, i konceptuar nga drejtoresha kreative Chemena Kamali.
Ky koleksion është frymëzuar nga arkivat e shtëpisë së modës dhe nga lidhja personale e Kamalit me historinë dhe estetikën e Chloe. “Doja diçka thellësisht personale të rikthehesha te gjërat që dua dhe te emocionet që ato zgjojnë tek unë”, shprehet Kamali për koleksionin.
Chloe u themelua në Paris në vitin 1952 nga Gaby Aghion, duke sjellë një qasje të re ndaj modës luksoze të gatshme për veshje, si një alternativë ndaj ‘haute couture’ të krijuar për klientë individualë.
Kjo trashëgimi e pasur u bë pikënisje për koleksionin e ri, ku punimi i sofistikuar u kombinua me veshje të rehatshme dhe të përdorshme në përditshmëri.
Një tjetër drejtim i koleksionit u shfaq përmes veshjeve të frymëzuara nga ‘lingerie’, duke krijuar kontraste me pallto të stilit të peshkatarëve, pelerina dhe kapele me strehë të gjerë.
Sfilata vjen në një periudhë kur tregu i luksit po përballet me parashikime më të kujdesshme për rritjen, pas dy vitesh tkurrjeje në segmentin e mallrave personale të luksit.
Burimi origjinal i informacionit: telegrafi .com
