Hulumtuesi nga Instituti Demokratik të Kosovës, Eugen Cakolli, ka bërë thirrje që partitë parlamentare të gjenden në një qëndrim të përbashkët institucional lidhur me aktgjykimin e Dhomave të Specializuara në Hagë.
Ai ka theksuar se do të ishte e papranueshme që seanca e nesërme e Kuvendit të Kosovës të shndërrohej në përplasje mes partive apo në paraqitje të deklaratave të ndryshme për aktgjykimin. “Do të ishte e papranueshme që seanca e nesërme e Kuvendit të Kosovës të përfundonte në përplasje partiake apo deklarata konkurruese për verdiktin e Hagës, të cilin vetë partitë po e cilësojnë si goditje ndaj UÇK-së dhe Kosovës,” ka shkruar Cakolli.
Sipas tij, pas një vonese prej gati dy javësh, partitë parlamentare duhet të synojnë një qëndrim institucional me pajtim sa më të gjerë politik. “Minimumi që u kërkohet partive parlamentare është të dalin me një qëndrim institucional me pajtim sa më të gjerë politik,” ka deklaruar ai.
Cakolli gjithashtu ka përmendur protestat e zhvilluara në Kosovë dhe në vende të ndryshme të botës, duke thënë se përplasjet politike në Kuvend do të ishin një fyerje për qytetarët që kanë protestuar në mbështetje të luftës së UÇK-së. “Pas protestave e thirrjeve të mijëra qytetarëve në Kosovë dhe gjithandej botës për mbrojtjen e luftës çlirimtare, do të ishte fyerje për ta që nesër deputetët ta harxhonin seancën në përplasje e mospajtime me njëri-tjetrin, duke e kthyer edhe këtë çështje në vazhdim të përplasjeve të tyre të zakonshme,” theksoi Cakolli.
Në fund, ai ka ngritur një pyetje ndaj partive politike në rast se nuk arrijnë të bashkohen rreth kësaj çështjeje. “Nëse partitë politike nuk arrijnë të bashkohen as për këtë çështje, atëherë për çka saktësisht janë të gatshme ta vënë interesin e vendit përpara interesit partiak?” ka përfunduar Cakolli.
Burimi origjinal i informacionit: zeri .info
