Kryeministri i Kosovës, Albin Kurti, ka zhvilluar një takim me kryeministrin e Maqedonisë së Veriut, Hristijan Mickoski, në New York, në kuadër të Javës së Nivelit të Lartë të Sesionit të 81-të të Asamblesë së Përgjithshme të Kombeve të Bashkuara.
Gjatë këtij takimi, Kurti theksoi se kanë diskutuar për bashkëpunimin në fushën e infrastrukturës dhe energjisë, si dhe për avancimin e projekteve të përbashkëta mes dy vendeve.
Ai e theksoi rëndësinë e përshpejtimit të procedurave për projektin e tunelit Prizren-Tetovë, duke e cilësuar këtë projekt si të rëndësishëm për qytetarët dhe zhvillimin e turizmit dhe ekonomive të të dyja vendeve. “Vazhduam bisedën për bashkëpunimin në infrastrukturë e në energji, përkatësisht për avancimin e projekteve të përbashkëta.
Theksova rëndësinë e përshpejtimit të procedurave për tunelin Prizren-Tetovë, si projekt me rëndësi të veçantë për qytetarët, sikurse edhe për zhvillimin e turizmit dhe ekonomitë e të dyja vendeve”, ka shkruar Kurti.
Ai gjithashtu përmendi se në takim është diskutuar edhe për implementimin e marrëveshjes për thëngjillin.
Kurti theksoi se të dyja palët janë pajtuar të vazhdojnë punën për realizimin e këtyre projekteve, të cilat, sipas tij, kontribuojnë në ndërlidhjen rajonale dhe sigurinë energjetike. “Kosova dhe Maqedonia e Veriut, përveçse fqinje, janë shtete mike dhe partnere, me interesa të përbashkëta për paqe, siguri, zhvillim dhe integrim euroatlantik”, ka deklaruar Kurti.
Burimi origjinal i informacionit: zeri .info
