Kryeministri Albin Kurti ka zhvilluar një takim në New York me presidentin e Turqisë, Recep Tayyip Erdoëan.
Gjatë këtij takimi, ata diskutuan për aktgjykimin e Dhomave të Specializuara ndaj ish-krerëve të UÇK-së, të cilin Kurti e konsideron të padrejtë nga ana juridike dhe morale, si dhe të pasaktë historikisht dhe faktikisht. “Me Presidentin Erdoëan diskutova edhe për aktgjykimin e padrejtë juridikisht dhe moralisht dhe të pasaktë historikisht dhe faktikisht, të shpallur javën e kaluar nga Dhomat e Specializuara në Hagë ndaj ish-krerëve të UÇK-së, Hashim Thaçi, Kadri Veseli, Rexhep Selimi dhe Jakup Krasniqi, e që patjetër duhet të korrigjohet në Apel,” ka theksuar Kurti.
Gjatë takimit, kryeministri falënderoi Erdoëan për mbështetjen e vazhdueshme që Turqia i ofron Kosovës, e cila përfshin diplomacinë, fuqizimin ushtarak, bashkëpunimin në industrinë e mbrojtjes, si dhe përkrahjen për anëtarësim në NATO. “Kosova me Turqinë kanë vazhduar forcimin dhe rritjen tregtare, me ç’rast ato arrijnë në vlerën prej 1 miliard dollarësh, me synimin që të rriten më shumë në të ardhmen,” ka shtuar ai.
Kurti gjithashtu përmendi rritjen e investimeve në Kosovë, duke e theksuar hapjen e fabrikës së re të municionit në Gjakovë dhe Parkun e Energjisë së Erës në Rahovec, në bashkëpunim me kompani nga Turqia.
Ai shprehu mirënjohje për rolin e gjatë të Turqisë në KFOR, si dhe për kontributin e saj në sigurinë dhe stabilitetin në Kosovë.
Gjithashtu, kryeministri informoi se, së bashku me kryetaren e Preshevës, Ardita Sinani, kanë ngritur çështjen e diskriminimit të vazhdueshëm dhe sistematik të shqiptarëve atje. “Simetria e të drejtave të komuniteteve në vendet tona përkatëse është qasja dhe mënyra e domosdoshme për trajtim të drejtë dhe barabartë,” nënvizoi ai.
Në fund, kryeministri Kurti e ftoi presidentin Erdoëan për një vizitë në Kosovë.
Burimi origjinal i informacionit: zeri .info
