Organizata e Veteranëve të Luftës së UÇK-së (OVL-UÇK) ka kërkuar që aktakuza ndaj Fatmir Shehollit të mos trajtohet vetëm si çështje e përgjegjësisë individuale, por edhe në kuadër të sigurisë kombëtare të Kosovës.
Në një reagim, OVL-UÇK ka theksuar se respekton prezumimin e pafajësisë dhe se fajësia mund të përcaktohet vetëm përmes një procesi gjyqësor të pavarur, profesional dhe transparent.
Megjithatë, organizata ka kërkuar që institucionet të hetojnë në mënyrë të plotë akuzat për spiunazh dhe shantazh, përfshirë pretendimet për bashkëpunim të supozuar me BIA-n e Serbisë.
Sipas OVL-UÇK-së, hetimet duhet të përfshijnë çdo kontakt, ndërmjetës, burim, komunikim, lidhje financiare dhe person që mund të ketë pranuar materiale të ndjeshme. ‘Institucionet duhet të ndjekin provat kudo që të çojnë’, thuhet në reagim.
OVL-UÇK ka paralajmëruar se, nëse provat zbulojnë ekzistencën e rrjeteve më të gjera, ato duhet të shpërbëhen, duke vlerësuar se Kosova nuk duhet të tolerojë struktura të fshehta që, sipas saj, mund të grumbullojnë informacione, të formësojnë narrativa apo t’u shërbejnë interesave të huaja.
Organizata ka kërkuar gjithashtu që institucionet të verifikojnë nëse shërbimet inteligjente të vendeve armiqësore kanë mbledhur, përcjellë apo shfrytëzuar materiale që lidhen me luftën e UÇK-së.
OVL-UÇK ka theksuar se kjo çështje nuk duhet të barazohet me proceset që zhvillohen pranë Dhomave të Specializuara, por sipas saj, duhet të sqarohet origjina, përcjellja, konteksti dhe përdorimi i materialeve që potencialisht mund të kenë pasoja politike, institucionale ose gjyqësore. ‘Beteja për mbrojtjen e të vërtetës së UÇK-së nuk përfundoi më 12 qershor 1999.
Ajo vazhdon kundër luftës hibride, propagandës dhe shtrembërimit të qëllimshëm të historisë mbi të cilën ngrihet ky shtet’, thuhet në reagim.
Në fund, OVL-UÇK ka kërkuar nga institucionet e drejtësisë dhe sigurisë që të hetojnë të gjitha provat dhe të zbardhin se kush, sipas saj, mund të ketë vepruar kundër interesave të Kosovës, përmes cilave kanale dhe në interes të kujt.
Burimi origjinal i informacionit: zeri .info
