Kosova po pëson dëme të mëdha në arenën ndërkombëtare si pasojë e mungesës së institucioneve të konsoliduara dhe pasivitetit në diplomaci, ndërsa kjo situatë po i krijon hapësirë Serbisë për të lobuar kundër shtetësisë së Kosovës, vlerësojnë njohës të çështjeve ndërkombëtare dhe analistë politikë.
Sipas tyre, ngërçi politik i zgjatur dhe mungesa e një përfaqësimi të plotë institucional jashtë vendit po e dobësojnë pozitën e Kosovës në raport me partnerët ndërkombëtarë, në një kohë kur Serbia vazhdon aktivitetet e saj diplomatike kundër Kosovës.
Drejtori i Institutit të Konsulencës Politike “POLCON”, Fitim Mulolli, tha se mungesa e Kosovës në forumet ndërkombëtare dhe pasiviteti diplomatik kanë pasoja të mëdha për sovranitetin ndërkombëtar të vendit.
Mulolli tha se Serbia vazhdon të lobojë në mënyrë aktive kundër pavarësisë së Kosovës në institucionet ndërkombëtare, ndërsa mungesa e përfaqësimit të Kosovës i krijon hapësirë Beogradit që të veprojë pa kundërpërgjigje.
Ai vlerësoi se marrëdhëniet e Kosovës me partnerët kryesorë ndërkombëtarë janë dëmtuar, duke përmendur pezullimin e dialogut strategjik me SHBA-në dhe ngecjet në procesin e integrimit evropian.
Sipas Mulollit, kjo situatë ka krijuar një avantazh për Serbinë në arenën ndërkombëtare, ndërsa liderët kosovarë vazhdojnë të mos gjejnë marrëveshje për themelimin e institucioneve.
Kurse, analisti politik Jeton Halimi tha për Ekonomia Online se Kosova ka çaluar në diplomaci dhe se marrëdhëniet me SHBA-në dhe BE-në duhet të jenë ndër prioritetet e para pas themelimit të institucioneve.
Ai shtoi se dëmtimi i marrëdhënieve me SHBA-në dhe problemet në menaxhimin e situatës në veri kanë ndikuar në pozitën ndërkombëtare të Kosovës.
Sipas tij, mbështetja amerikane mbetet thelbësore për Kosovën dhe për avancimin e saj në arenën ndërkombëtare. ‘Pa SHBA-të e dinë shumë mirë edhe politikanët e popullit të Kosovës nuk mund të ecim asnjë hap më tutje.
Pa SHBA-në e përsëris prapë besoj që shteti i Kosovës do të jetë i cunguar i mangët dhe nuk ka krah për të shkuar më tutje pa përkrahjen e SHBA-ve dhe miqve tanë,’ tha ai.
Burimi origjinal i informacionit: zeri .info
