Një rast i vjedhjes është raportuar të ketë ndodhur në lokalin “Yumi Bubble Tea” në Prishtinë, ku katër djem të mitur dyshohet se kanë marrë para nga arka e biznesit.
Sipas njoftimit të publikuar nga lokali në rrjetet sociale, katër të rinjtë kanë hyrë së bashku në lokal dhe kanë qëndruar pranë njëri-tjetrit, duke pritur momentin e përshtatshëm për të kryer vjedhjen.
Biznesi pretendon se njëri prej tyre ka shpërqendruar punëtoren, ndërsa të tjerët kanë arritur të marrin paratë nga arka. Më pas, tre prej tyre janë larguar menjëherë nga vendi i ngjarjes.
Sipas të njëjtit burim, punëtorja ka arritur ta ndalojë njërin nga djemtë, por ai dyshohet se e ka kafshuar në krah për t’u liruar dhe më pas është larguar nga lokali.
Pronarët e biznesit kanë bërë thirrje për kujdes ndaj bizneseve të tjera në kryeqytet, duke paralajmëruar për rastin dhe duke kërkuar vigjilencë më të madhe.
“Pronarë të bizneseve të vogla në Prishtinë, ju lutemi të keni kujdes! Sot më herët gjatë pasdites, një grup prej 4 djemsh hyri në biznesin tonë të vogël dhe vodhi para nga arka jonë. Ata hynë së bashku, qëndruan afër njëri-tjetrit dhe pritën momentin e duhur për të përfituar. Po e ndajmë këtë për të paralajmëruar edhe pronarët e tjerë të bizneseve, ju lutemi qëndroni vigjilentë dhe mbroni bizneset tuaja. Fytyrat janë turbulluar për arsye privatësie. Qëndroni të sigurt dhe bëni kujdes! Njëri prej djemëve shpërqendroi punëtoren ndërkohë që të tjerët vodhën arkën dhe vrapuan. Mbetur mbrapa kur punëtorja e ndali djalin, ai e kafshoi në dorë dhe vrapoi”, thuhet në reagimin e lokalit “Yumi Bubble Tea”.
