Qeveria talebane e Afganistanit ka akuzuar Pakistanin për sulme ajrore gjatë natës ndaj shtëpive civile në Kabul dhe në provincën jugore Kandahar, ndërsa përplasjet mes dy vendeve kanë hyrë në javën e tretë.
Sipas talebanëve, në sulme janë vrarë edhe gra dhe fëmijë.
Zëdhënësi i qeverisë, Zabihullah Mujahid, tha se avionët pakistanezë goditën gjithashtu depo karburanti të kompanisë private ajrore Kam Air pranë aeroportit të Kandaharit.
Nga ana tjetër, ushtria dhe qeveria e Pakistanit nuk kanë reaguar ende ndaj akuzave.
Përplasjet mes dy vendeve janë përshkallëzuar që nga 26 shkurti, kur forcat afgane nisën një ofensivë përgjatë kufirit të përbashkët, si kundërpërgjigje ndaj sulmeve ajrore pakistaneze kundër militantëve të Tehrik-e-Taliban Pakistan.
Autoritetet në Kabul thanë se të paktën shtatë persona janë vrarë në Afganistan që nga e marta në përplasjet ndërkufitare, ndërsa bilanci mund të rritet pas sulmeve të fundit.
Sipas Kombeve të Bashkuara, operacionet ushtarake pakistaneze në Afganistan kanë vrarë të paktën 56 civilë, përfshirë 24 fëmijë, nga 26 shkurti deri më 5 mars.
Ndërkohë, rreth 115 mijë persona janë detyruar të largohen nga shtëpitë e tyre për shkak të luftimeve.
