Këngëtarja shqiptare me famë botërore, Rita Ora, ka mbërritur në Australi në prag të paraqitjeve të saj në dy evente të rëndësishme që do të mbahen në këtë vend.
Artistja britanike u pa duke zbritur në aeroportin e Sidneit të dielën, ku dukej në humor të shkëlqyer dhe plot energji. 35-vjeçarja u shfaq me një stil casual por tejet elegant.
Ajo kishte veshur një kanotiere gri të ngushtë, të kombinuar me një këmishë me vija, të hapur dhe me prerje të stilit “boyfriend”, e cila dukej sikur mund t’i përkiste bashkëshortit të saj, regjisorit nga Zelanda e Re, Taika Waititi.
Rita kishte zgjedhur rehati për udhëtimin, duke e kompletuar paraqitjen me pantallona të zeza sportive dhe atlete të bardha Nike.
Ajo e mbrojti fytyrën e saj të njohur me syze dielli të markës luksoze, ndërsa flokët bionde i kishte mbledhur pas koke dhe i kishte mbuluar me një shami bardh e zi.
Pamjes i shtoi disa aksesorë ari, ndërsa grimi ishte minimal, duke ruajtur një paraqitje natyrale.
Prekja finale e stilit të saj ishte një çantë luksoze Hermès Birkin prej lëkure të zezë, me vlerë rreth 28 mijë dollarë australianë.
Rita pritet të ndajë një çmim në eventin “Vogue Forces of Fashion” në Sidnei gjatë këtij muaji, si dhe do të performojë në Formula 1 Grand Prix 2026 në Melburn, që do të mbahet në muajin mars.
Rita dhe regjisori e aktori Taika Waititi kurorëzuan dashurinë e tyre me martesë në vitin 2022, duke e bërë këngëtaren njerkë të dy vajzave të tij.
Në një nga komentet e rralla për jetën e saj familjare, Rita tregoi se roli i njerkës ia ka ndryshuar mënyrën se si e sheh botën.
Regjisori 50-vjeçar Taika Waititi i ka dy vajzat nga martesa e tij e mëparshme me Chelsea Winstanley.
Vitin e kaluar, Rita dha një intervistë për revistën “Hunger”, ku foli rrallë për martesën e saj, ndërsa u shfaq në një set fotografik mbresëlënës.
Ajo theksoi se miqësia e fortë mes saj dhe Taikës është themeli i marrëdhënies së tyre romantike. Çifti u martua në një ceremoni sekrete në gusht të vitit 2022, pasi ishte vetë Rita ajo që theu traditën dhe i propozoi martesë partnerit.
Ceremonia e tyre modeste u konfirmua publikisht një vit më vonë.
Në një intervistë për “Grazia”, Rita tregoi se gjithçka u organizua spontanisht, “pa asnjë planifikim”.
