Sektori i Hetimeve të Kryeqytetit, me autorizim nga prokuroria kompetente, ka bërë thirrje publike për bashkëpunim me qytetarët në funksion të identifikimit të disa personave të dyshuar, të cilët shihen në fotografitë e publikuara.
Sipas njoftimit zyrtar, personat në fjalë dyshohen për përfshirje në veprën penale “Vjedhja e identitetit dhe pajisja e qasjes”. Organet e rendit janë duke zhvilluar hetime intensive dhe kërkojnë mbështetjen e publikut për të avancuar procesin e identifikimit dhe zbardhjes së rastit.
Autoritetet u bëjnë thirrje të gjithë qytetarëve që, nëse posedojnë çfarëdo informate që mund të ndihmojë në identifikimin e personave të dyshuar, të kontaktojnë Policinë e Kosovës përmes numrit emergjent 192 ose në adresën elektronike: info@kosovopolice.com.
Policia garanton trajtim konfidencial të informatave dhe thekson se bashkëpunimi i qytetarëve është kyç në luftën kundër veprave penale dhe ruajtjen e sigurisë publike.
