Turqia ka nënshkruar një marrëveshje paraprake me Kinën të enjten më 12 nëntor, e cila ka për qëllim tërheqjen e rreth 15 miliardë dollarëve (13.5 miliardë euro) investime në projekte diellore dhe të erës, njoftoi ministri i energjisë.
Marrëveshja u firmos gjatë samitit të klimës COP31 të OKB-së në Antalia.
Ajo përfshin planet për ndërtimin e parqeve diellore dhe të erës me një kapacitet të kombinuar gjenerues prej shtatë gigavatësh, si dhe ruajtjen e energjisë dhe përmirësimin e rrjetit elektrik.
Ministri i Energjisë, Alparslan Bayraktar, theksoi se ky bashkëpunim do të përfshijë gjithashtu ndarjen e teknologjisë për të mbështetur prodhimin e pajisjeve të turbinave me erë në Turqi.
Megjithatë, njoftimi nuk ofroi asnjë afat kohor për projektet apo detaje se si do të financoheshin ato.
Nënshkrimi i marrëveshjes pasoi bisedimet midis Presidentit turk Rexhep Tajip Erdogan dhe Zëvendëspresidentit kinez Han Zheng në samitin e 11 nëntorit.
Han njoftoi se Pekini ishte i gatshëm të inkurajonte më shumë kompani kineze të investonin në Turqi dhe identifikoi energjinë e rinovueshme si një fushë për bashkëpunim më të ngushtë, sipas agjencisë shtetërore kineze të lajmeve Xinhua.
Në fund të shtatorit, Turqia kishte rreth 43.8 gigavat kapacitet të energjisë diellore dhe të erës, që përbënte pak më shumë se një të tretën e kapacitetit të saj total të gjenerimit të energjisë elektrike, sipas ministrisë së saj të energjisë.
Qeveria ka për qëllim të rrisë kapacitetin e energjisë diellore dhe të erës në 175 gigavat deri në vitin 2040, sipas strategjisë së saj të re kombëtare të energjisë.
Ky plan ka si qëllim të zhvendosë më shumë përdorimin e energjisë së vendit nga nafta dhe gazi në energji elektrike.
Duke folur në samitin e 10 nëntorit, Bayraktar vlerësoi se Turqia do të ketë nevojë për rreth 300 miliardë dollarë (270 miliardë euro) investime për tranzicionin e saj energjetik deri në vitin 2040.
