Kimberly Powell, 48-vjeçarja që mban pozitat e zëvendëspresidentes dhe drejtoreshës së përgjithshme për sektorin e shëndetësisë në kompaninë Nvidia, është vënë në qendër të një skandali pas një raportimi nga “The New York Times”.
Ajo dyshohet se ka pasur një lidhje jashtëmartesore me drejtorin ekzekutiv të kompanisë, Jensen Huang.
Sipas gazetës, që citon pesë burime të njohura me situatën, Huang dhe Powell janë parë duke shkëmbyer përkëdhelje në një hotel në San Jose gjatë konferencës vjetore të zhvilluesve të Nvidia-s, e njohur si GTC, në mars.
Disa burime pretendojnë se kjo skenë është filmuar, megjithatë gazeta sqaron se nuk e ka parë vetë incizimin.
Një burim tjetër ka raportuar se sigurimi i Huangut kishte vërejtur një person që po i filmonte dhe i ishte ofruar një marrëveshje konfidencialiteti.
Të dy, Huang, 63 vjeç, dhe Powell, janë të martuar me persona të tjerë, dhe deri më tani askush nga ata nuk e ka konfirmuar publikisht këtë informacion.
Kur u kontaktua nga gazetarët, Huang tha se nuk duhej të flitej me të për këtë çështje dhe ndërpreu telefonatën.
Kimberly Powell ka 18 vite në karrierën e saj në Nvidia, ku iu bashkua në maj të vitit 2008.
Që nga tetori i vitit 2017, ajo mban pozitën e zëvendëspresidentes dhe drejtoreshës së përgjithshme për sektorin e shëndetësisë, duke kontribuar në zhvillimin e këtij sektori në nivel global.
Ajo është përgjegjëse për platforma që përdorin inteligjencën artificiale në imazherinë mjekësore, shkencat biologjike, zhvillimin e barnave dhe analizat shëndetësore.
Para këtij pozicioni, ajo kishte drejtuar sektorin e arsimit të lartë dhe kërkimit shkencor në Nvidia, si dhe Nvidia AI Labs dhe programin Nvidia Inception.
Rrugëtimi i Powell në këtë fushë filloi me një diplomë në inxhinieri elektrike me specializim në inxhinierinë kompjuterike në Universitetin Northeastern në Boston.
Ajo gjithashtu ka përfunduar programe në menaxhimin e projekteve në Universitetin e Bostonit dhe në shkollën e menaxhimit MIT Sloan.
Karrierën e saj e nisi si inxhiniere e harduerit në DOME Imaging Systems dhe më pas kaloi në Planar Systems.
Në vitin 2006, ajo u bë menaxhere e marketingut të produkteve në sektorin e pajisjeve mjekësore.
Në një intervistë të dhënë për podcastin “Lifers with Christina Farr”, ajo e përshkroi mundësinë për të integruar procesorët grafikë të Nvidia-s në sektorin e shëndetësisë si një realizim të një ëndrre.
Powell ishte planifikuar të fliste në samitin Milken mbi të ardhmen e shëndetësisë në Washington, por nuk mori pjesë.
Gazetarja e CNBC-së, Meg Tirrell, njoftoi se organizatorët e kishin informuar për tërheqjen e saj.
Ndërkohë, sipas “New York Post”, Powell është e martuar dhe nënë e dy fëmijëve.
As ajo dhe as Huang nuk kanë dhënë një deklaratë publike për akuzat e paraqitura nga “The New York Times”, ndërsa Nvidia nuk ka dhënë përgjigje për mediat mbi këtë çështje.
Këto pretendime vijnë pas një emaili të Huangut drejtuar punonjësve, ku ai pranoi pabesinë ndaj bashkëshortes së tij lidhur me një tjetër aferë të pretenduar me Alice Huang.
Burimi origjinal i informacionit: telegrafi .com
