Deputetja e Lidhjes Demokratike të Kosovës (LDK), Janina Ymeri, ka shprehur kritika të ashpra ndaj Qeverisë Kurti për menaxhimin e sektorit të energjisë.
Ajo e akuzoi qeverinë për dështim në sigurimin e energjisë elektrike dhe për mungesë të progresit në zhvillimin e burimeve të ripërtëritshme.
Gjatë një diskutimi në Kuvendin e Kosovës, Ymeri theksoi se inflacioni nuk është rezultat i situatave në Ngushticën e Hormuzit, por për shkak të rritjes së çmimeve të energjisë dhe shërbimeve.
Ajo kritikoi qeverinë për politikat energjetike dhe përmendi emrat e Vuk Hamoviqit dhe Martin Berishajt. “Inflacioni nuk është shkaktuar nga Ngushtica e Hormuzit, por nga energjia edhe nga çmimi i energjisë, edhe nga çmimi i shërbimeve.
Kur jemi te energjia, në agjendë të Vuk Hamoviqit keni punuar kësisoj: burimet e ripërtëritshme kanë pasë zero progres gjatë këtij raporti.
Keni dështuar të siguroni energji elektrike sepse keni ardhur me skemë të instaluar me kompani, me ZRRE që ia ka ndreq agjendën, me KOSTT për t’i shërbyer Martin Berishajt dhe skemës”, deklaroi Ymeri.
Ajo ngriti gjithashtu akuza në lidhje me pretendimet për financimin e fushatës dhe lidhjet e mundshme me personat që përmendi.
Ymeri kërkoi që kryeministri Albin Kurti të dalë dhe t’u përgjigjet këtyre pretendimeve. “A mund ta demantoni që nuk i keni marrë para Martin Berishajt për fushatë dhe nuk i keni borxh Vuk Hamoviqit, ujkut të qeverisë suaj?
Me këtë pyetje mund t’i drejtoheni Albin Kurtit dhe nëse mund ta demantojë, mund të vijë këtu”, tha Ymeri.
Deklaratat e saj u bënë gjatë diskutimit parlamentar për çështjet që lidhen me energjinë dhe ndikimin e kostos së saj në ekonominë e vendit.
Burimi origjinal i informacionit: zeri .info
