Kombëtarja e Kosovës në futsall ka pësuar humbjen e dytë radhazi nga Italia, në kuadër të Grupit 10 të raundit kryesor kualifikues për Kupën e Botës 2028.
Pas disfatës dramatike 4-3 në Prishtinë, “Dardanët” janë mposhtur edhe në ndeshjen e kthimit në Itali, me rezultat 3-0.
Ndeshja e zhvilluar në Barletta ishte përballja e tretë e Kosovës në këtë fazë kualifikuese.
Golashënuesit për Italinë në fitoren 3-0 ndaj Kosovës ishin Gabriel Motta (14’23”), Antonio Molaro (16’10”) dhe Maurizio Silvestri (39’30”).
Kësaj radhe, përfaqësuesja jonë nuk arriti të përsëriste paraqitjen e mirë të ndeshjes së parë, kur përkundër disavantazhit prej tri golash, u rikthye në lojë dhe kishte barazuar rezultatin në 3-3, para se Italia të shënonte golin e fitores në fund.
Humbja në Itali bën që Kosova të mbetet me tri pikë në Grupin 10, të fituara në ndeshjen hapëse ndaj Gjeorgjisë, të cilën e kishte mposhtur me rezultat 3-2 në udhëtim.
Ndërkohë, Italia ka konfirmuar epërsinë në grup, duke marrë pikët e plota në dy përballjet direkte me Kosovën.
Për Kosovën, sfida e fundit e kësaj faze do të jetë jashtëzakonisht e rëndësishme.
Më 24 shkurt 2027, “Dardanët” do ta presin Gjeorgjinë në ndeshjen që mund të përcaktojë pozitën përfundimtare në grup dhe mundësinë e vazhdimit të rrugëtimit drejt Kupës së Botës.
Objekti i Kosovës është të sigurojë pozitën e dytë dhe të mbetet në garë përmes fazës së play-offit.
