Shefi i asamblistëve të Lëvizjes Vetëvendosje në Kuvendin Komunal të Prishtinës, Gëzim Sveçla, vizitoi hapësirën e njohur si “Fontana” në lagjen Ulpiana, ku është planifikuar ndërtimi i një parkingu nëntokësor dhe i një objekti kolektiv.
Sveçla ka shprehur kundërshtimin e tij ndaj këtij projekti, duke theksuar se propozimi i ekzekutivit të Prishtinës, i miratuar në seancën e jashtëzakonshme më 6 nëntor, është paraqitur në emër të Lojërave Mesdhetare, pavarësisht se sipas tij, nuk ka asnjë lidhje me këtë organizim.
Ai theksoi se Lëvizja Vetëvendosje ka votuar kundër propozimit për dy arsye: së pari, mungesa e ndërlidhjes së projektit me Lojërat Mesdhetare, dhe së dyti, ndikimi që ndërtimet e reja mund të kenë në karakterin urban të Ulpianës. “Siç e dini, më 6 nëntor, në një seancë të jashtëzakonshme të Kuvendit të Prishtinës, jo vetëm që është diskutuar, por edhe është miratuar një projekt i ekzekutivit të Prishtinës, që ka të bëjë me ndërtimin e një parkingu nëntokësor dhe një objekti kolektiv në këtë hapësirë ku ndodhemi.
Propozimi ka ardhur kinse në emër të Lojërave Mesdhetare.
Ne, që në seancë, e kemi kundërshtuar këtë propozim për dy arsye.
Arsyeja e parë është sepse kemi qenë të bindur, dhe më vonë u dëshmua edhe nga ministri i Sportit, i cili konstatoi se ky projekt nuk ka të bëjë me Lojërat Mesdhetare.
Arsyeja e dytë është se po flasim për Ulpianën, një lagje ikonike të qytetit, një ndër lagjet më të urbanizuara që ka Prishtina.
Andaj, ndërtimi i objekteve shtesë do ta rëndonte këtë lagje dhe do t’ia humbte karakterin urban.
Për këtë arsye, ne votuam kundër këtij propozimi”, ka deklaruar Sveçla.
Pavarësisht kundërshtimit të asamblistëve të Vetëvendosjes, propozimi ka marrë mbështetje nga asamblistët e LDK-së, PDK-së dhe partive të tjera që qeverisin me Prishtinën. “Fatkeqësisht, me votat e asamblistëve të LDK-së dhe PDK-së, si dhe të partive të tjera që qeverisin me Prishtinën, ky propozim u miratua”, ka thënë ai.
Sveçla gjithashtu përmendi reagimet publike të qytetarëve kundër projektit, duke theksuar rëndësinë e Ulpianës për banorët e Prishtinës dhe ata që kanë studiuar e jetuar aty për vite. “Pastaj, siç e dini, kishte një reagim publik të qytetarëve të Prishtinës dhe jo vetëm të Prishtinës, sepse Ulpiana ngjall nostalgji dhe ka histori për secilin student që ka qenë në Prishtinë për dekada të tëra.
Si pasojë e këtij reagimi publik, pamë një tërheqje të Përparim Ramës mbrëmë, përmes një statusi ku ai tha se, nëse qytetarët nuk e duan projektin, ai nuk do të ecë përpara”, ka deklaruar Sveçla.
Megjithatë, ai kritikoi deklaratën e kryetarit të Prishtinës, Përparim Rama, duke pretenduar se po krijohet një imazh i pasaktë lidhur me procedurën e miratimit të projektit. “Ajo që vlen të potencohet në këtë rast është se kemi të bëjmë me një tendencë për mashtrim nga zoti Rama, sepse ai tha që fillimisht duhet të merret pëlqimi i banorëve dhe pastaj të votohet propozimi në Kuvend.
Kjo nuk ka ndodhur.
Ky propozim tashmë është votuar në Kuvend me 29 vota për”, ka thënë Sveçla.
Burimi origjinal i informacionit: zeri .info
