Kandidati i Listës Studentore nga Kosova, Jugosllav Gashiq, theksoi më 7 nëntor se nuk do të ketë bashkëpunim me Listën Serbe.
Ai shpjegoi se “me dikë që gjatë gjithë kësaj kohe ka qenë fajtori kryesor dhe përgjegjës për pozitën në të cilën ndodhen serbët, vërtet nuk mund të ketë asnjë bashkëpunim”.
Lista Studentore, e formuar pas protestave antiqeveritare në Serbi, fitoi zgjedhjet e parakohshme parlamentare në fund të tetorit, duke rrëzuar pas 14 vjetësh ish-presidentin serb, Aleksandar Vuçiq, dhe Partinë e tij Përparimtare Serbe (SNS).
Për më shumë se një dekadë, Lista Serbe ka dominuar përfaqësimin politik të serbëve në Kosovë.
Kjo parti është formuar me mbështetje nga SNS dhe ish-presidenti Vuçiq, duke vepruar në Kosovë me këtë mbështetje deri tani.
Në Kuvendin e Kosovës, Lista Serbe ka nëntë nga dhjetë ulëset e rezervuara për serbët, si dhe udhëheq të gjitha komunat me shumicë serbe.
Gashiq përsëriti qëndrimin e tij të shprehur në fund të tetorit në radion lokale Kim, duke thënë se Lista Serbe është “zbatuesja e politikave të SNS-së” në Kosovë dhe theksoi se “nuk duam asnjë kontakt e asnjë bashkëpunim me ta”. “Ata kanë pozita të caktuara institucionale, mbi të cilat ne nuk mund të ndikojmë, por këto pozita nuk do t’i mbrojnë nga përgjegjësia e mundshme penale për veprimet që kanë kryer.
Ekzistojnë mekanizma të ndryshëm, por më e rëndësishmja është se ata do të mbahen nën kontroll”, tha Gashiq për Radio Televizionin e Serbisë (RTS).
Sipas tij, ata që janë fajtor për “situatën në të cilën ndodhet populli serb” nuk kanë të drejtë morale “të flasin për atë që do të duhet të bëjë dikush tjetër”.
Ai i inkurajoi serbët të mbeten të qetë, duke thënë se “nuk do të ndërpritet asnjë ndihmë financiare”. “Mesazhi për serbët këtu është që gjatë kësaj periudhe tranzicioni, derisa ne ende nuk e kemi marrë efektivisht pushtetin, të mos bien pre e thashethemeve të ndryshme që vijnë nga Lista Serbe, se do të mbeten pa paga, pa ndihmë sociale, se gjoja ne do ta tradhtojmë Kosovën e kështu me radhë”, theksoi Gashiq.
Duke folur për qëndrimin e pushtetit në largim në Beograd ndaj serbëve në Kosovë, ai theksoi se autoritetet nga SNS kanë proklamuar se janë kujdesur për serbët, por në të vërtetë, sipas Gashiqit, ky pushtet ka tradhtuar interesat kombëtare të serbëve.
Gashiq gjithashtu komentoi për procesin e dialogut mes Kosovës dhe Serbisë, që ndërmjetësohet nga Bashkimi Evropian.
Sipas tij, përfaqësuesit e pushtetit të ri në Serbi do të rishqyrtojnë të gjitha dakordimet e arritura përmes Marrëveshjes së Brukselit.
Ai bëri të ditur se do të rishikohen edhe marrëveshjet e tjera ndërkombëtare, që të mund të korrigjohen ato negative. “Jemi plotësisht të vetëdijshëm për mënyrën se si pushteti i kaluar [në Beograd] është sjellë ndaj popullit në Kosovë dhe Metohi.
Atyre u është marrë dinjiteti, janë përballur me presion dhe shantazh.
Pres që shumë shpejt, si disa nga rezultatet e para, të shohim çlirimin dhe lirinë e popullit për të shprehur mendimin e vet dhe për të rikthyer dinjitetin që ka humbur”, u shpreh Gashiq.
Lista Studentore fitoi 52.54 për qind të votave në zgjedhjet e 25 tetorit, ndërsa SNS-ja e Vuçiqit mori 39.29 për qind.
Autoritetet zgjedhore në Serbi shpallën rezultatet përfundimtare të zgjedhjeve, duke i hapur rrugë formimit të institucioneve të reja.
Pritet që Lista Studentore ta formojë e vetme Qeverinë e re të Serbisë, por ende nuk dihet se kush do të jetë kandidati i saj për kryeministër dhe ajo nuk ka prezantuar një program të qartë politik.
Pas zgjedhjeve, Lista Serbe tha se “i pranon” rezultatet, duke u shprehur se mbetet “e përkushtuar” ndaj lidhjeve institucionale me Beogradin.
Burimi origjinal i informacionit: zeri .info
