Dukagjin (Dugi) Lipa, menaxheri dhe babai i Dua Lipës, si dhe themeluesi i Sunny Hill Festival, do të jetë një nga folësit kryesorë në konferencën CROWD & LOUD, e organizuar nga Entrio.
Kjo është konferenca më e madhe në rajon për industrinë e eventeve, e cila do të mbahet më 12 nëntor në Lauba, Zagreb.
Lipa ka një përvojë mbresëlënëse prej mbi 25 vjetësh në muzikë, media dhe teknologji.
Ai është pas sukseseve globale të Dua Lipës, përfshirë albumin e saj nr. 1 në botë, “Radical Optimism”, si dhe paraqitjet në Grammy dhe BRIT Awards, përveç performancës kryesore në Glastonbury dhe turneut botëror në stadiumet më të njohura.
Me Sunny Hill Festival, ai ka vendosur Kosovën në hartën muzikore ndërkombëtare dhe ka hapur dyer të reja për industrinë kreative shqiptare.
Gjatë bisedës me gazetarin Galeb Nikačević, Lipa do të diskutojë për tri tema të rëndësishme: si ndërtohet një karrierë botërore, sa vlen një brend muzikor dhe çfarë i nevojitet një festivali lokal për t’u bërë ndërkombëtar.
Përveç tij, ligjërata kryesore do të mbahen edhe nga Jim Digby, drejtor i turneve të Linkin Park, dhe Tamás Kádár, CEO i festivalit Sziget në Hungari.
Në program do të kenë vend edhe mbi 20 folës të tjerë, mes të cilëve Rambo Amadeus, Rene Bitorajac dhe Jan Kerekeš.
Në katër panele do të diskutohet për faktorët që ndihmojnë në shitjen e biletave: ylli, zhurma mediatike apo përvoja.
Do të diskutohet gjithashtu për kufirin mes artit dhe biznesit, si dhe nëse rajoni mund të ndërtojë një industri muzikore të qëndrueshme.
Dita do të përfundojë me një ceremoni çmimesh dhe koncerte nga artistë si Edo Maajka, Rambo Amadeus dhe të tjerë, përveç një DJ party.
Biletat kushtojnë 100 euro, ose 90 euro për ata që kanë kartë Mastercard.
Ato përfshijnë programin e ditës dhe të mbrëmjes dhe mund të blihen online në platformën Entrio.
Më shumë informata mund të gjeni në www.crowdandloud.com.
Burimi origjinal i informacionit: telegrafi .com
