Një aksident i rëndë ka ndodhur të premten në lindje të Francës, kur një autobus me 43 udhëtarë doli jashtë rrugës dhe u përplas me një pemë.
Si rezultat i këtij incidenti tragjik, një fëmijë dhe një i ri humbën jetën, ndërsa 16 persona të tjerë u lënduan.
Aksidenti ndodhi rreth orës 07:00 në qytetin Lent, ndërsa autobusi po udhëtonte nga Lyoni në drejtim të Bourg-en-Bresse.
Në mesin e udhëtarëve ndodheshin edhe 15 fëmijë.
Sipas prokurorisë së Bourg-en-Bresse, tre persona janë në gjendje kritike, ndërsa 13 të tjerë kanë pësuar lëndime të lehta.
Shoferi i autobusit, gjithashtu i lënduar, është dërguar në spital dhe ende nuk është marrë në pyetje nga policia.
Ministri francez i Arsimit, Edouard Geffray, konfirmoi se në mesin e udhëtarëve kishte nxënës dhe shprehu keqardhje për aksidentin.
Në vendin e ngjarjes janë angazhuar ekipet e emergjencës, helikopterët mjekësorë dhe më shumë se 100 zjarrfikës.
Të lënduarit rëndë janë transportuar në një spital të specializuar.
