William Baeten është një nga futbollistët më të paguar në futbollin kosovar, sipas informacionit të publikuar nga ProSport.
Futbollisti belg, i cili iu bashkua Dritës gjatë verës së vitit 2026, raportohet se përfiton rreth 12,500 euro në muaj.
Kjo shumë e vendos Baetenin në mesin e futbollistëve me pagat më të larta ndonjëherë në futbollin e Kosovës.
Nëse shifra e publikuar është e saktë, ai përfiton rreth 150 mijë euro në vit vetëm nga paga, pa llogaritur bonuset apo përfitimet e tjera që mund të jenë pjesë e marrëveshjes me klubin gjilanas.
Baeten, 29-vjeçar, erdhi te Drita pas disa ndryshimeve në karrierën e tij, duke kaluar fillimisht nëpër futbollin rumun dhe më pas atë shqiptar.
Ai ishte transferuar te FCSB nga FCU Craiova për rreth 300 mijë euro, por nuk arriti të sigurojë një rol të rëndësishëm dhe, pas vetëm një viti, u largua pa kompensim transferimi.
Pas aventurës në Rumani, Baeten iu bashkua Flamurtarit në Shqipëri.
Megjithatë, as aty nuk qëndroi gjatë, duke u larguar në fillim të vitit 2026 pas rreth gjashtë muajsh.
Më pas, mesfushori belg vazhdoi karrierën e tij në Kosovë, duke nënshkruar me Dritën.
Emri i tij u rikthye në vëmendjen e mediave rumune edhe për shkak të një çështjeje gjyqësore me ish-klubin FCSB dhe pronarin Gigi Becali.
FIFA, më 23 shtator 2026, i kishte shqiptuar klubit rumun ndalesë për regjistrimin e futbollistëve në tri afatet e ardhshme kalimtare, për shkak të një borxhi prej rreth 50 mijë eurosh ndaj Baetenit.
FCSB më pas e shlyeu detyrimin financiar ndaj futbollistit belg, duke e zgjidhur çështjen që kishte sjellë sanksionin.
Kështu, Baeten fitoi betejën për pagesën e shumës që i takonte nga ish-klubi i tij.
Ndërkohë, aventura e tij te Drita nuk ka shkuar pa vështirësi.
Pasi kishte nisur të luante rregullisht, Baeten pësoi një dëmtim muskulor që e mbajti jashtë fushave për rreth dy muaj.
