Presidenti amerikan, Donald Trump, përballet me rrezikun e humbjes së shumicës në Kongres gjatë zgjedhjeve të mesmandatit, një trend që ndjek historinë politike në SHBA, e cila tregon se partia e presidentit në detyrë zakonisht pëson humbje në këto zgjedhje.
Republikanët janë të shqetësuar për mundësinë që demokratët të fitojnë kontrollin e Dhomës së Përfaqësuesve dhe, potencialisht, edhe të Senatit.
Gjatë 20 zgjedhjeve të fundit të mesmandatit, partia e presidentit ka humbur ulëse në Dhomën e Përfaqësuesve në 18 raste.
Përjashtim bëjnë zgjedhjet e vitit 2002, kur republikanët arritën të fitojnë pas sulmeve terroriste të 11 shtatorit, dhe ato të vitit 1998, kur demokratët e presidentit Bill Clinton arritën ta ruajnë shumicën.
Në këto zgjedhje, janë në garë të gjitha 435 ulëset e Dhomës së Përfaqësuesve dhe 35 nga 100 ulëset e Senatit.
Humbja e shumicës në njërën prej dhomave do t’ia vështirësonte Trumpit miratimin e ligjeve dhe zbatimin e agjendës së tij politike.
Nëse demokratët arrijnë të kontrollojnë Dhomën e Përfaqësuesve, ata do të kenë mundësinë të nisin hetime ndaj administratës dhe të kërkojnë dëshmi e dokumente nga zyrtarët qeveritarë.
Gjithashtu, marrja e shumicës në Senat do t’u jepte demokratëve mundësinë të bllokojnë ose vonojnë emërimet e presidentit në poste të rëndësishme shtetërore dhe gjyqësore.
Për ta arritur këtë, ata duhet të fitojnë katër ulëse që aktualisht mbahen nga republikanët, duke ruajtur njëkohësisht të gjitha ulëset që kanë.
