Pamjet nga brenda ‘Old Trafford’ tregojnë reagimin e Michael Carrick ndaj veprimeve të Matheus Cunhas, pas fitores emocionuese të Manchester Unitedit ndaj Romës në Ligën e Kampionëve.
Manchester United kaloi një mbrëmje dramatike të martën, duke përmbysur disavantazhin prej dy golash të pësuar në 14 minutat e para dhe duke triumfuar ndaj Romës.
Kjo fitore shënoi fundin e serisë së dobët të rezultateve për klubin, por festa u shoqërua edhe me një moment tensioni mes trajnerit Carrick dhe sulmuesit brazilian.
Cunha ishte një nga protagonistët kryesorë të përmbysjes, së bashku me kapitenin Bruno Fernandes, i cili realizoi një penallti për ta ngushtuar rezultatin në 2-1.
Braziliani shënoi dy gola, të cilët u dëshmuan vendimtarë për fitoren e “Djajve të Kuq”.
Goli i parë i Cunhas erdhi në minutën e 83-të, ndërsa vetëm tri minuta më vonë ai realizoi golin e fitores.
Pas një goditjeje spektakolare, sulmuesi hoqi fanellën dhe festoi me tifozët në tribunat e Old Traffordit.
Megjithatë, ky veprim i kushtoi me karton të verdhë.
Cunha më vonë mori edhe kartonin e dytë të verdhë, pas një ndërhyrjeje të vonshme ndaj Leonardo Balerdit, duke u ndëshkuar me karton të kuq.
Pavarësisht përjashtimit, braziliani qëndroi në stadium për të ndjekur pjesën e mbetur të ndeshjes.
Pas përfundimit të saj, ai u fut sërish në fushë për të festuar suksesin me bashkëlojtarët dhe tifozët.
Por festa e tij nuk zgjati shumë.
Pamjet tregojnë Carrickun, i cili duket qartë i irrituar, duke e kapur Cunhan dhe duke i kërkuar të largohej menjëherë nga fusha.
Sulmuesi u largua i frustruar, ndërsa pjesa tjetër e ekipit vazhdonte festimet për fitoren e madhe.
