Fabrizio Romano ka sjellë një përditësim të rëndësishëm rreth talentit të Manchester Unitedit, JJ Gabriel, i cili është shumë pranë transferimit te Real Madridi. 16-vjeçari konsiderohet si një nga talente më premtues në futbollin botëror, ndërsa së fundmi është raportuar se dëshiron të largohet nga Manchester Unitedi.
Gabriel dhe përfaqësuesit e tij insistojnë se ai duhet ta vazhdojë zhvillimin në një klub tjetër, pasi është shprehur i pakënaqur me situatën te skuadra angleze.
Për shërbimet e tij kanë shfaqur interes disa prej klubeve më të mëdha evropiane.
Barcelona, Bayern Munich dhe Paris Saint-Germain janë lidhur me një transferim të mundshëm, por Real Madridi është parë si destinacioni më i mundshëm për disa javë tani.
Tani, Romano ka konfirmuar se marrëveshja mes Gabrielit dhe Real Madridit ende nuk është përfunduar, por ka zbuluar se talenti anglez ka qëndruar në Madrid gjatë ditëve të fundit dhe se transferimi mund të konkretizohet brenda muajit të ardhshëm. “Djali ka qëndruar në Madrid për disa ditë gjatë javëve të fundit.
Ai po stërvitet shumë për t’u përgatitur për janarin, kur do të ketë mundësi t’i bashkohet një klubi të ri”, ka thënë Romano në kanalin e tij në YouTube. “Real Madridi mbetet favorit i qartë për të nënshkruar me JJ Gabrielin.
Për momentin, pritshmëritë e të gjitha palëve të përfshira janë që JJ Gabriel të transferohet te Real Madridi.”
