Deputeti i partisë së ekstremit të djathtë gjermane AfD, Marcel Queckemeyer, është përjashtuar nga një fluturim i Ryanairit pasi dyshohet se ofendoi një punonjës aeroporti me origjinë turke.
Incidenti ka ndodhur më 18 tetor në aeroportin Münster/Osnabrück, por tani po bëhet publik.
Queckemeyer ishte duke u përgatitur të udhëtonte drejt Mallorcës, kur disa pasagjerë u përfshinë në një debat me një punonjës të aeroportit lidhur me bagazhet e dorës, të cilat dyshohet se nuk përmbushnin kërkesat e kompanisë ajrore.
Sipas raportimeve, deputeti ndërhyri në këtë debat dhe filloi ta kritikonte punonjësin me një ton të lartë.
Ai dyshohet se i tha: “Nuk ke arritur asgjë në jetë dhe tani punon këtu në aeroport.” Ryanair e konfirmoi se ia kishte refuzuar hipjen në avion për shkak të sjelljes së tij.
