Deputeti i PDK-së, Arben Mustafa, ka shprehur kritika ndaj Agjencisë së Ushqimit dhe Veterinarisë (AUV) për vendimin e saj që, sipas tij, ka shkurtuar afatin e vlefshmërisë së analizave laboratorike për produktet që janë të destinuara për eksport, nga gjashtë muaj në vetëm 15 ditë.
Në një postim, Mustafa thekson se ky vendim është marrë pa paralajmërim dhe pa një periudhë tranzitore, duke i shkaktuar dëme të drejtpërdrejta prodhuesve dhe eksportuesve kosovarë. “Ky vendim sjell kosto shtesë për kompanitë, vonesa në dërgesa, dëmshpërblime kontraktuale, anulim të porosive dhe humbje të tregjeve të eksportit”, ka shkruar ai.
Mustafa e ka cilësuar të papërgjegjshme marrjen e vendimeve që ndikojnë drejtpërdrejt në veprimtarinë e bizneseve pa konsultime paraprake dhe pa vlerësuar pasojat ekonomike.
Ai i ka kërkuar AUV-it ta rishqyrtojë vendimin dhe ta pezullojë përkohësisht zbatimin e kriterit 15-ditor.
Gjithashtu, ka bërë thirrje për konsultime me prodhuesit dhe eksportuesit, në mënyrë që bizneseve t’u jepet kohë e mjaftueshme për t’u përgatitur.
Burimi origjinal i informacionit: zeri .info